張理賠支票行邊條路，一開始就要問定
租約車同供緊嘅車，法律上嘅擁有權或者擔保權益仲喺租賃公司、銀行手上。佢哋個名會出現喺保單上面，理賠嗰陣亦喺成條流程入面：賠付金額大嘅時候，保險公司開出嚟張支票可能同時抬頭畀您同財務公司，或者照您授權直接畀修車廠。
呢樣嘢值得一早問清楚。報案嗰陣直接話畀理賠專員知架車喺租約或者供緊，等對方講明張支票點行。如果拖到攞車嗰日先發現支票要寄去銀行簽名，就白白多等一兩個星期。
車修喺邊間照舊由您決定。安省車主有權自己揀修車廠，租約同貸款合約改變唔到呢一條。合約入面寫得含糊嘅條款，影低發過嚟一齊睇都得。
維修水準要預埋還車驗車嗰日先算合格
租約完結嗰陣會有一次驗車，驗嘅係正常損耗以外嘅傷：明顯凹痕、刮穿嘅漆、縫位唔齊、顏色對唔上嘅板件，全部記低嚟收費。所以事故維修唔可以整到「行得」就算，要整到驗車嗰位睇唔出問題。
落到工藝上面，即係隻色照漆碼調準、需要時向鄰板過渡，縫位執返均勻，換過嘅部件安裝實淨冇鬆動。呢啲本來就係我哋嘅標準做法，只不過對租約車嚟講，佢直接關係到還車嗰日使唔使補錢。
距離到期仲有排嘅車，我哋通常建議將今次事故維修同還車前嘅細傷一齊規劃。當中嘅取捨，租約車還車嗰篇寫得再細啲。
發票維修單相片留齊一套，還車嗰日攞得出手
呢啲材料有兩個用處：還車時驗車員對某塊板有疑問，您攞得出當時點修嘅紀錄；提前買斷或者轉手嗰陣，一份齊全嘅資料好過口講。
- 維修單：寫明換咗咩部件、行咗咩工序、噴咗邊幾塊板
- 發票：自費部分同保險賠付部分分開列明
- 拆檢同維修過程嘅相：證明損傷範圍同處理方式
- 車身量度紀錄：涉及結構校正嘅一定要留
- 感應器校準報告：如果今次維修郁過雷達或者鏡頭
零件揀邊種，租約車要諗多一重
安省冇法例硬性規定用原廠件，保險公司好多時照同等質素嘅副廠件核價。但租約車要諗多一層：還車驗收睇嘅係外觀一致性同裝配質素，副廠件嘅縫位配合有時差嗰一皮，驗車員偏偏就係睇呢啲。
涉及安全嘅部位——結構件、氣袋相關部件、帶感應器嘅支架——我哋會向保險公司爭取原廠件（OEM），理由寫入估價說明。爭唔到嗰陣，將差價話您知，由您決定補唔補。呢類選擇我哋負責畀齊判斷依據，唔會代您揸主意。
常見問題
除咗保險公司，租賃公司嗰邊使唔使知會一聲？
建議通知，尤其損傷大或者涉及結構嗰啲。多數租約要求架車維持喺可正常使用狀態、按規範修復，早講好過還車嗰日先俾人問起。
墊底費嗰筆係咪照樣由我找？
係。墊底費（deductible）跟保單行，同架車係租定供冇關係。理賠點分擔、邊啲項目自費，我哋喺估價階段就同您逐項對清楚。
供緊嘅車俾保險公司判咗全損，條數點拆？
保險公司照實際現金價值賠，呢筆錢先償還財務公司，剩返嘅先到您手。如果車價跌得快過貸款餘額，差額要您補，除非您買咗對應嘅保障條款。
想分開兩次整，留返啲等還車前先執，得唔得？
得，但要分清邊啲等得。見金屬嘅花痕同已經入水嘅位拖耐咗會生銹，範圍反而變大。我哋會將要即刻做嘅同可以押後嘅分開列畀您。